Act 23 | NdeIBE | STEP | UPhawuli wawujolozela umphakathi weSanihedrini wathi, “Bazalwane, sengiwugcwalisile umlandu wami kuNkulunkulu ngikhululekile enhliziyweni kuze kube lamuhla.”

Acts 23

1 UPhawuli wawujolozela umphakathi weSanihedrini wathi, “Bazalwane, sengiwugcwalisile umlandu wami kuNkulunkulu ngikhululekile enhliziyweni kuze kube lamuhla.”

2 Umphristi ophezulu, u-Ananiya, kwamzondisa lokhu watshela labo ababemi eduze kukaPhawuli ukuthi bammuhluze umlomo. 3 UPhawuli wathi kuye, “UNkulunkulu uzakumukula, wena mduli oconjwe ngekalaga emhlophe! Lapha uhlalele ukungahlulela ngomthetho, ikanti wena ngokwakho uyaweqa umthetho ngokulaya ukuthi ngitshaywe!”

4 Labo ababemi eduze kukaPhawuli bathi, “Ulesibindi sokuthuka umphristi ophezulu kaNkulunkulu wena?”

5 UPhawuli waphendula wathi, “Bazalwane, bengingazi ukuthi ungumphristi ophezulu; ngokuba kulotshiwe ukuthi: ‘Ungakhulumi okubi ngombusi wabantu bakini.’

6 UPhawuli wayesazi ukuthi abanye babo babe ngabaSadusi, abanye bengabaFarisi wasememeza phakathi kweSanihedrini wathi, “Bazalwane, mina ngingumFarisi, indodana yomFarisi. Ngithoniselwa ukuthi ngilethemba ekuvukeni kwabafileyo.” 7 Wathi ngokutsho lokhu kwavuka umsindo phakathi kwabaFarisi labaSadusi, umphakathi wasudabukana phakathi. 8 (AbaSadusi bathi kakulakuvuka ekufeni, lokuthi kakulazingilosi loba imimoya, kodwa abaFarisi bayakuvuma konke lokho ukuthi kukhona.)

9 Kwaba lokuxokozela okubi, kwathi abanye abafundisi bomlayo ababe ngabaFarisi basukuma bayidaza inkani. Bathi, “Kasiboni lutho olubi ngendoda le. Kungaze kwenzeka yini ukuthi umoya kumbe ingilosi ikhulumile kuye na?” 10 Yavutha inkani umlawuli webutho waze wesaba ukuthi uPhawuli wayezadatshudatshulwa yibo. Waselaya amabutho ukuthi ehle ayomsusa kubo ngamandla amlethe esikanisweni samabutho.

11 Ngobusuku obulandelayo iNkosi yema eduze kukaPhawuli yathi, “Mana isibindi! Njengalokhu usufakaze ngami eJerusalema, kusamele njalo uyofakaza eRoma.”

Icebo Lokubulala UPhawuli

12 Ngokusa okulandelayo abaJuda bakha icebo bazibopha ngesifungo ukuthi kabazukudla kumbe banathe bengakambulali uPhawuli. 13 Kwakungamadoda eqa amatshumi amane ayephathelene lalelocebo. 14 Baya kubaphristi abakhulu labadala bathi, “Sesifunge ijoyi ukuthi kasiyikudla lutho size siqale sibulale uPhawuli. 15 Yikho-ke lina leSanihedrini khalazani kumlawuli webutho ukuthi amlethe kini ngegwegwe lokuthi lifuna incazelo eqondileyo ngecala lakhe. Thina sesilungisile ukumbulala engakafiki lapha.”

16 Kodwa kwathi ukuba indodana kadadewabo kaPhawuli isilizwile lelicebo, yaya esikanisweni samabutho yayamtshela uPhawuli.

17 UPhawuli wasebiza omunye umphathi wekhulu wathi, “Hamba lomfana lo kumlawuli wamabutho; kukhona afuna ukukutsho kuye.”

18 Ngakho wasemusa kumlawuli. Umphathi wekhulu wathi, “Isibotshwa uPhawuli ungibizile wangicela ukuthi ngilethe umfana lo kuwe ngokuba kukhona afuna ukukutshela khona.”

19 Umlawuli wamthatha umfana wambamba ngesandla waya laye eceleni wambuza wathi, “Kuyini ofuna ukungitshela khona?”

20 Wathi; “AbaJuda sebevumelene ukuthi bakucele wena ukuthi ulethe uPhawuli phambi kweSanihedrini kusasa ngegwegwe lokuthi bafuna incazelo epheleleyo mayelana laye.

21 Ungabavumeli ngokuba abeqa amatshumi amane babo bazamcathamela. Sebenze isifungo ukuthi bangadli njalo banganathi bengakabulali uPhawuli. Kunje nje sebelungile, sebelindele imvumo yakho ngesicelo sabo.”

22 Umlawuli wathi kahambe umfana, wamqonqosela wathi, “Ungatsheli muntu ukuthi usungazisile ngalokhu.”

UPhawuli Udluliselwa EKhasariya

23 Yikho wasebiza abaphathi bebutho ababili wabalaya wathi, “Lungisani ixuku lamabutho angamakhulu amabili, abakhweli bamabhiza abangamatshumi ayisikhombisa labangamakhulu amabili abahlome ngemikhonto ukuthi baye eKhasariya lamuhla ebusuku ngehora lesithathu. 24 Lilungisele loPhawuli amabhiza ukuze asiwe kuMbusi uFelikhe engalimalanga.”

25 Wabhala incwadi kanje:

26 Klawudiya Lisiya, Kumhlekazi, uMbusi uFelikhe: Ngiyabingelela.

27 Indoda le yabanjwa ngabaJuda, okwathi sebezama ukuyibulala ngafika lamabutho ami sayilamulela ngoba ngasengizwile ukuthi ingumRoma. 28 Ngadinga ukwazi ukuthi babesithi yoneni, yikho ngayiletha phambi kweSanihedrini yabo. 29 Ngezwa ukuthi icala layo laliphathelene lomlayo wabo, kodwa kwasweleka icala elingafanela ukufa loba ukugwetshelwa entolongweni. 30 Ngithe sengilunywe indlebe ngecebo lokuyibulala ngahle ngayedlulisela kuwe. Ngiphinde ngatshela omayimangalela ukuthi bazokwethula kuwe abammangalela ngakho.

31 Yikho amabutho azilandela lezoziyalezelo amthatha uPhawuli ebusuku ayamfikisa e-Antiphatri. 32 Ngosuku olulandelayo amabutho amtshiya leqembu labakhwele amabhiza ukuthi liqhubeke laye, bona babuyela esikanisweni sabo. 33 Kwathi abamabhiza sebefikile eKhesariya bayethula incwadi kumbusi loPhawuli laye bamnikela kuye. 34 Umbusi wayibala incwadi wambuza ukuthi wayedabuka kusiphi isifunda. Esezwile ukuthi waye ngoweKhilikhiya, 35 Wathi, “Icala lakho ngizalihlola nxa labo abakumangalelayo sebefikile lapha.” Waselaya ukuthi uPhawuli agcinwe elindiwe esigodlweni sikaHerodi.